Plattdütske Theaterspeelers bringt eer Publikum tout lachen!
Von A. Kossen, 07.11.2023
Florian un Oliver Bleibtreu bünt tweij Broijers un beide Professoren. Se gaht nu all stramm up de 40 tou un genießt eer Leewen för de Wissenschaft. Dat passt Tante Inge, 73 Johr olt, aber goor nich. Se versorget de beiden un kümmert sück üm eeren Haushalt, weil de beiden bi eer wohnt. Ununnerbrooken erinnert se de beiden doran, wat se eere Öllern versprooken habt, bevör de storben bünt: „Jichenseen mutt freen.“ Freij owersettet hett dat im Kontext so full as „Irgendeene van de beiden mutt troun un eene Familge gründen.“ Man Bewegung kump erst in de Angelegenheit as Tante Inge androot „mit een poor düchtige Deerns“ nahtohelpen un de beiden Kerlse mit de junge Frau Laura konfronteert. Un as Tante Inge sück dat dacht haf: Up Mal willt se beide freen…
Use Schoilkers Eva Reuvers, Lena Reuvers un Enno Bentlage stünden dat erste Mal för so grootet Publikum up de Bühne un habt de Zuschauers gemeinsam mit Schoulmester Kossen, de insprungen is, richtig begeistert. Denn grooten Applaus un de utgelaatenen Lacher habt de intensive Vörbereitung un dat Utwendiglernen hella würdigt un honoriert. „Dat Speelen haff richtig Spaß mooket un na een poor Minuten har sück de Upregung uck leggt.“, bünt sück Lena, Eva un Enno eenig un se freut sück all up de nächste Theater-Saison. Un wi hopet, dat wi dann weer so een begeistertet Publikum mit masse Zuschauers begrüßen dröwet! Wi freut us, wenn ie weer kohmt!
Allerbesten Dank segget wi Michael Wolken un Wolfgang Perkol för denn Bühnenbau, Ula Wlottkowska för Maske un fört Soufflieren, de Schülerfirma fört Catering, Hubert Schwenen för Ton, Licht, Technik un Aufzeichnung sowie Gesche Gloystein un Bernd Grünefeld för de wunnerbore Zusammenarbeit in Rahmen vant PlattSatt-Festival van de Emsländische Landschaft!
