Dütt un dat – un alet up Platt

Schulsieger im plattdeutschen Lesewettbewerb ermittelt

Van C. Migura an'n 15.03.2013

An Dönnerdag, den 14.3. göw et bi us int Marianum weer den plattdütsken Vörläsewettstried, wecker ale twäe Jaohr int häile Land Neersassen utschräwen werd. Bolde 30 Winners ut de enkelden Klassen wassen tohope kaomen, üm de Besten van use Schaule heruttofinnen.

Dat Läsen klappde heller gaud; wisse bünt dor weckere van de Vörläsers vörher bi Oma off Opa int Training wäen. Dat was uck klauk, denn mit spitte Ohren lusterde dat Publikum up ehre Dönkes - nich tau vergäten de dräi Schaulmesters van de Jury, Hermann Breer, Anne Kühlenborg un Christoph Migura. Mangs tröck äin Gniesen öäwer ehre Backen, de Dönkes ludden doch tau moi!

Ain poor Maol köm dorbi de Osterhase vörbihoppeln, äin Knienken was dor uck äis tüsken – un pass tau den Schnäi in use Schaugorn kreegen wi sogor noch äine Wiehnachtsgeschichte tau hörn.

Un nu use Allerbesten:

Klasse 5/6: Hannah Bergmann (5e)
Klasse 7/8: Leonie Wessels (7a)
Klasse 9/10: Ewers (10a)
Klasse 11/12: Christin Backers (12 D-Lk)

Wi drückt ehr düchtig de Doomen för de näögeste Runne bit Vörläsen, den Regionalwettstried för Möppen, Haselünne un Hesselke annen 11. 4. hier int Marianum.